Mustafë eksperti

Merr rrogë nga buxheti i Kosovës, dhe u pagua si ekspert i jashtëm. Mustafë Hasani është i punësuar në njësinë për Partneritet Publiko-Privat (PPP) në kuadër të Ministrisë së Financave dhe në të njëjtën kohë ka hartuar në cilësinë e ‘ekspertit të jashtëm’ raportin e performancës së Ndërmarrjeve Publike për vitin 2011, duke dalë kundër institucionit ku punon.

Hasani me këtë raport ka kundërshtuar ‘shefin’ e tij, ministrin e Financave, që në Komisionin Ndërqeveritar të Ndërmarrjeve Publike e mbështeste një raport tjetër për këto ndërmarrje, atë të Ministrisë së Zhvillimit Ekonomik.

Hasani “urdhrin” për hartimin këtij raporti e kishte marrë nga Komisioni për Mbikëqyrje Financiare Publike, i cili udhëhiqet nga deputeti i LDK-së, Ali Sadriu.
Ky veprim është i ndaluar me Ligjin mbi Shërbyesit Civilë, pasi që krijon konflikt interesi, shkruan gazeta “Tribuna”.

Neni 52.1 i këtij ligji përcakton se në ushtrimin e funksionit të tyre, nëpunësi civil duhet të përcaktohet në zbatimin e ligjshmërisë dhe mbrojtjen e interesit publik dhe jo në realizimin e fitimeve personale apo për individë apo organizata të tjera. “Nëpunësi civil nuk do të bëjë veprime apo të marrin vendime, të cilat i tejkalojnë kufijtë e rangut dhe funksioneve të tyre, përveç atyre të përcaktuara me këtë ligj”, thuhet në nenin 52.2. /Indeksonline/