Mustafa: Zhvillimi i qëndrueshëm ekonomik, prioritet i Qeverisë

Kryeministri i Republikës së Kosovës, Isa Mustafa, ka pritur sot në takim përfaqësuesin e përhershëm të UNDP’së, Andrew Russell.

Gjatë takimit Mustafa-Russell u bisedua për zhvillimin ekonomik dhe përkrahjen e UNDP’së për Kosovën, thuhet në një komunikatë të lëshuar nga Zyra për Komunikim Publik e Zyrës së Kryeminsitrit.

Mustafa e falënderoi për mbështetjen e UNDP’së në kuadër të përmbushjes së kritereve për pranim në programin e Sfidave të Mijëvjeçarit (MCC) si dhe në projektet tjera që lidhen me zhvillimin e qëndrueshëm ekonomik.

Ai, me këtë rast, e njoftoi për progresin në Kosovë, duke veçuar sukseset e arritura në proceset eurointegruese që lidhen me rekomandimin për liberalizimin e vizave dhe hyrjen në fuqi të MSA’së, si dhe në fusha të tjera.

Kryeministri Mustafa, po ashtu, theksoi prioritetet e Qeverisë së Kosovës për zhvillim të mëtejmë ekonomik dhe integrime eurointegruese.

Përfaqësuesi i përhershëm i UNDP’së, Russell, shprehu përkrahjen e mëtejme të UNDP’së për Kosovën.