Mustafa: Vetëm diletantët ose të manipuluarit mund ta quajnë Kuvendin e konstituar

Ish-kryeministri Isa Mustafa ka reaguar pas vendimit të Kryetarit të Kuvendit, Dimal Basha, i cili e konsideroi të përfunduar seancën konstituive edhe pa zgjedhjen e nënkryetarit nga komuniteti serb.

Mustafa në një prononcim për GazetaBlic, tha se një veprim i tillë është në kundërshtim me Kushtetutën dhe Rregulloren e Kuvendit.

Ai thekson se vetëm një diletant ose një i manipuluar që vepron kundër rendit Kushtetues pritet të konstato se e konsideron të konstituar Kuvendin.

Nëse lexohet, Kushtetuta thotë se Kuvendi konstituohet me zgjedhjen e kryetarit dhe tre nënkryetarëve nga tre partitë e para të dala në zgjedhje, të një nënkryetari nga komuniteti joshumicë serb dhe një nënkryetari nga komunitetet tjera joshumicë joserbe. Pa u përmbushur këto zgjedhje, vetëm një diletant ose një i manipuluar, i cili vepron kundër rendit kushtetues, pritet të konstatoj se e konsideron të konstituar Kuvendin”, u shpreh ai.

Ai shtoi se Kosova nuk duhet të lejojë, siç e quajti, politikën e logjikën “me kushtetutë e pa kushtetutë”, pasi që e dimë se ku mund të na dërgoj kjo sjellje.

“Kosova nuk guxon ti nënshtrohet politikës dhe logjikës “me kushtetutë e pa kushtetutë” sepse ne e kemi përjetuar këtë dhe e dimë se ku mund të çojë kjo sjellje!”, përfundoi ai.