Mustafa uron besimtarët islamë për Ramazan

Gjilan – Me rastin e fillimit të muajit të shenjtë të Ramazanit, që është njëra ndër festat më të rëndësishme myslimane, kryetari i Komunës së Gjilanit, Qemajl Mustafa, ka uruar Këshillin e Bashkësisë Islame në Gjilan si dhe gjithë komunitetin e këtij besimi, duke iu uruar agjërim të lehtë.

Ramazani është muaj i sakrificës dhe i sprovës së shpirtit, është muaj i solidaritetit njerëzor dhe i përkushtimit të njeriut ndaj Krijuesit thuhet në urimin e Mustafës.

Përmes agjërimit, njeriu tregon dashurinë dhe sinqeritetin e tij ndaj familjes, ndaj shoqërisë dhe ndaj rrethit ku jeton.

Uroj që këtë periudhë ta kaloni në paqe, mirëkuptim e mirësi të ndërsjellë si dhe në tolerancë me besimet tjera.

Paçi agjërim të lehtë, paçi shëndet e forcë për ta përmbushur më së miri këtë obligim. Zoti e madhëroftë sakrificën tuaj, thuhet në urimin e kryetarit Mustafa, drejtuar KBI dhe qytetarëve të besimit islam./rajonipress/