Mustafa: Ta madhërojmë ditën e flamurit

Gjilan – Delegacioni i Kuvendit Komunal së bashku me veteranët e luftës, partitë politike, shoqata e asociacione tjera kanë bërë homazhe tek varrezat e dëshmorëve për nder të ditës së flamurit. Mesazhi i Qemajl Mustafës për këtë ditë ishte që të madhërohet dhe të nderohet me pietet sepse falë këtyre dëshmorëve sot Kosova e Gjilani frymon lirshëm.

Qemajl Mustafa i shoqëruar nga Izmi Zeka , shoqata e parti politike kanë bërë homazhe tek varrezat e dëshmorëve për të nderuar e përkujtuar ditën e flamurit, ditë kjo kur shumë shqiptarë kudo që ndodhen kanë përjetuar momente të rënda, janë arrestuar e vrarë vetëm pse deshën që flamuri të valojë lirshëm në trojet shqiptare, raporton rajonipress.

Qemajl Mustafa pasi ka vendosur lule mbi varrezat e dëshmorëve dhe pasiqë ka takuar familjarët e dëshmorëve tha se sot ai ka emocione që ndodhet tek varrezat e dëshmorëve. ”Kur dal këtu e ndiej vetën shumë të vogël karshi këtyre burrave që dhanë më të shtrenjtën jetë. Ne kemi obligim që ta madhërojmë këtë ditë duke i nderuar e përkujtuar të gjithë ato gjenerata e breza që dhanë gjithçka për të valuar flamuri i lirë” tha Mustafa.

Edhe Ahmet Daku i cili shoqërohej nga Ilir Tahiri nga shoqata e veteranëve të luftës tha se kjo ditë është e madhe dhe e shënuar për shokët e tij. ”Ndihem vërtet krenar që tani jam në mesin e shokëve dhe të idealeve tona” tha Daku.

Naser Ibrahimi nga familjet e dëshmorëve tha se kjo ditë sa i jep emocione e pikëllim, megjithatë i jep edhe kurajë dhe vullnet që amaneti i dëshmorëve po jetësohet.”Sot jemi të lirë, sot festojmë bashkë dhe ky ishte misioni i vëllezërve tanë, i burrave dhe i ushtarakëve shqiptarë që dhanë jetën e tyre për të ardh deri tek kjo ditë” tha Ibrahimi./rajonipress/