Mustafa: S’mund të ketë konflikt të armatosur në Preshevë

Nuk vërehet numër i shtuar i qytetarëve në Preshevë por as forca policore nuk shihen deri në këto qaste. Megjithatë, kryetari i kësaj Komune, Ragmi Mustafa e quan të tensionuar gjendjen aktuale.

Sipas tij, këtë gjendje në lidhje me lapidarin e kanë sjellë mediat serbe, të cilat siç thotë Mustafa, i kanë bërë presion kryeministrit serb, Ivica Daqiq që të reagojë me forcë ndaj tij.

Në një intervistë për Kosovapress ai ka thënë se spektri politikë në Preshevë është unik për mos zhvendosjen e lapidarit, edhe pse takimi i paraparë mes Mustafës dhe krerëve të tjerë politikë të Preshevës për në orën 11:00, ende nuk ka filluar.

Mustafa thotë se së shpejti është duke u bërë gati dokumentacione për legalizimin e lapidarit.

I pyetur rreth mundësisë së heqjes së lapidarit me forcë, dhe ardhjes deri tek një konflikt i mundshëm i armatosur shqiptaro-serb, Ragmi Mustafa nuk pret që të ndodh kjo, ngase, sipas tij, ka disproporcion të forcave dhe ka shtuar se do t’i përdorin të gjitha mundësitë demokratike.

Mustafa thotë se kanë përkrahje të madhe nga Prishtina zyrtare dhe Tirana zyrtare.