Mustafa: S’kanë legjitimitet të flasin ata që rrezikuan raportet me SHBA’në

Lideri i LDK’së, Isa Mustafa, ka thënë se askush që ka rrezikuar raportet e Kosovës me Shtetet e Bashkuara të Amerikës s’ka legjitimitet të flasë e veprojë në emër të Republikës.

Në një reagim në Fb, Kryetari i LDK’së ka folur edhe për raportet e Kosovës me BE’në dhe të deleguarin e posacën Mirsollav Lajca, i cili kishte kundërshtuar Kosovën të anëtarësohej edhe në UNESCO.

“Ndajmë bindjen se ata që rrezikuan marrëdhëniet me SHBA-të, nuk kanë legjitimitet të flasin dhe veprojnë në emër të shtetit të Kosovës”, ka shkruar Mustafa në një reagim.

“Relacionet , qëndrimet politike dhe besimi në BE-në dhe SHBA-të, qëndrojnë në doktrinën tonë properëndimore. Ato nuk janë fluskula të politikave ditore, se kush është me Thaçin e kush me Kurtin”, ka shtuar a.

Postimi i Kryetarit të LDK’së”

Qytetarë të nderuar,

Ardhmëria e Kosovës është dhe mbetet në integrimet evropiane dhe euroatlantike. Anëtare e BE-së dhe NATO-s dhe në miqësi e partneritet të ngushtë me SHBA-të.

Kemi të drejtë të zhgënjehemi në BE-në dhe në disa vende të BE-së për mosliberalizim të vizave. Kemi të drejtë, po ashtu, të shprehim shqetësimin tonë sesi do ta drejtojë dialogun perfaqësuesi i lartë i BE-së, Borell, i cili Serbinë e cilëson shtet, kurse Kosovën, vetëm, vend që nuk e kanë njohur edhe 5 shtete të BE-së. Ose se, a është më i qëlluari i tij, z. Lajçak, që kundërshtoi anëtarësimin e Kosovës në UNESKO, ai që do të jetë neutral në ndërmjetësimin e dialogut. Ose a është raportuesja për Kosovën në Parlamentin Evropian, raportuese për krejtë Kosovën apo raportuese e një partie politike të majtë, ashtu siç po sillet!?

Zhgënjimi nuk është humbje e besimit. Besimi në BE dhe institucionet e saj qëndron në orientimin tonë të paluhatshëm dhe pa alternativë të integrimit tonë evropian. Një mik imi thoshte, “edhe nëse na largojnë nga dera, ne hyjmë nga dritarja”.

Askush nuk mund të na largojë nga bindjet dhe përkatësia jonë evropiane dhe euroatlantike. Edhe pa liberalizim të vizave, ne jemi këtu, brenda kufijve evropian, bashkëpunojmë me vendet anëtare të BE-së, institucionet e saja, me Partitë Popullore Evropiane (EPP), dhe nuk ndalemi së punuari për të drejtat tona dhe vizionin tonë si qytetarë evropian. Nuk i ndryshojmë bindjet tona politike, si bindje demokratike që janë themeli ynë!

Relacionet , qëndrimet politike dhe besimi në BE-në dhe SHBA-të, qëndrojnë në doktrinën tonë properëndimore. Ato nuk janë fluskula të politikave ditore, se kush është me Thaçin e kush me Kurtin.

Interpretimi i tillë është mënyra më primitive dhe më diletante e rezonimit politik, i kujdoqoftë ai. Edhe i ndonjë diplomati që bindjet e veta i ndërton në ndeja, darka e dreka,me ata që i pēlqenë dhe i flasin ashtu siç ai/ajo do të dëshironte të dëgjoj. I disa mediave apo pjese të shoqerisë civile. I militantëve partiak dhe “rebelëve” partiak.

LDK i beson BE-së, sepse e konsideron shtëpi të vetën politike, demokratike dhe ekonomike. Jo se BE është e përkryar.

LDK ka besim të palëkundur në partneritetin e përhershëm me SHBA-të, si aleat strategjik i saj. Beson në shtetin dhe popullin amerikan, që e shpëtoi Kosovën në kohët më vështira. Beson se me SHBA-të, e në bashkëpunim me BE-në mund të përmbyllet procesi i dialogut me njohje reciproke.

Ndajmë bindjen se ata që rrezikuan marrëdhëniet me SHBA-të, nuk kanë legjitimitet të flasin dhe veprojnë në emër të shtetit të Kosovës.

LDK ka dije, kuadro dhe vizion të drejtoj shtetin, të luftoj Pandeminë e pamërshishme, të ballafaqohet me pasojat ekonomike dhe sociale të Covid-19 si dhe të avancoj vendin në rrugën tonë evropiane. Shtëpia nuk mbahet pa miq, thoshte Presidenti Historik, Dr. Rugova ; andaj LDK është garancioni për përparim në partneritet, në BE, gjithsesi, me SHBA domosdo. IM

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).