Mustafa për koalicionet: LDK’ja nuk ia jep askujt postin e kryeministrit

Kryetari i Lidhjes Demokratike të Kosovës, Isa Mustafa, ka vlerësuar se të gjitha partitë kryesore të vendit duhet të garojnë të vetme në zgjedhjet e parakohshme, që pritet të mbahen këtë vjeshtë.

Mustafa ka thënë në emisionin “Pressing”, në televizionin T7, se pret që LDK’ja dhe disa parti të tjera – me të cilat ajo mund të bashkëpunojë – të bëjnë “një marrëveshje xhentlëmene” për zgjedhjet.

“Nëse shohim se gjatë rrugës do të bëhen koalicione – dhe tash po duket se ka deklarata të tilla, njerëzit s’po e fshehin – ne do të jemi të gatshëm të ulemi e të bëjmë marrëveshje parazgjedhore”, ka theksuar ai.

Mustafa ka folur për bisedimet me kreun e Lëvizjes Vetëvendosje, Albin Kurti, për një koalicion parazgjedhor.

“Me Kurtin kemi biseduar edhe për nevojën të bëhemi bashkë. S’jemi marrë vesh”, ka deklaruar Mustafa në T7.

Ai ka thënë se LDK’ja nuk do t’ia linte asnjë partneri të mundshëm koalicioni postin e kryeministrit.

“Në asnjë rast LDK’ja s’mund të bëjë koalicion me dikë dhe të thotë që do të heq dorë nga posti i kryeministrit”, është shprehur Mustafa.

Kreu i LDK’së ka thënë se partia e tij është më e madhja në vend, dhe i takon ky post. /Express/