Mustafa: Pa mbështetjen e SHBA-së, ekzistenca e Kosovës si shtet do të ishte e pamundur

Kryetari i Lidhjes Demokratike të Kosovës, Isa Mustafa ka uruar Shtetet e Bashkuara të Amerikës për ditën e pavarësisë.

Ai, përmes një telegram urimi ka thënë se kjo ditë është një moment kthese për historinë botërore.

“Kjo ditë është moment kthese për historinë botërore dhe shënon arritjen e suksesshme të të gjithë atyre që i besuan idealit për liri, demokraci dhe paqe”, ka thënë Mustafa.

Ai, ka deklaruar se lidhja e SHBA-së me Kosovës e ka shndërruar këtë të fundit në aleatin e parezervë të tyre.

“Për idealet e njëjta populli i Kosovës u mishërua dhe kjo lidhje e përbashkët mes SHBA-ve dhe Kosovës e ka shndërruar Kosovën në aleatin e parezervë që SHBA-të e kanë sot dhe do ta kenë gjithmonë edhe në të ardhmen”, thitë Mustafa në urimin e tij.

Sipas Mustafës, pa mbështetjen e SHBA-së, ekzistenca e Kosovës si shtet do të ishte e pamundur.

“Shfrytëzoj rastin ta shpreh mirënjohjen e thellë për mbështetjen e paparë të SHBA-ve që e ka dhënë për lirinë dhe pavarësinë e Kosovës, dhe sot për zhvillimin e saj. Pa mbështetjen e SHBA-së, çlirimi dhe vetë ekzistenca e Kosovës si shtet do ishin thuajse të pamundura, andaj i jemi përjetësisht mirënjohës”, ka deklaruar Mustafa.