Mustafa: Nuk do t`i lodhim qytetarët, do të fitojmë në raundin e parë

Gjilan – Qemajl Mustafa në hapje të fushatës së bashku me kandidatët për këshilltar komunal tha se nuk do të ketë raund të dytë në Gjilan. Unë dhe PDK do t`i fitojmë zgjedhjet qysh në raundin e parë dhe nuk do t`i lodhim qytetarët për të shkuar edhe në një raund tjetër tha ai.

Qemajl Mustafa në hapje zyrtare të fushatës tha se është interes edhe i konkurrentëve dhe i partive tjera politike që edhe kësaj radhe të fitojë PDK-ja.”Me PDK kanë fituar të gjithë në Gjilan, andaj unë jam i sigurt se nuk do të ketë raund të dytë në Gjilan. Ne nuk do t`i lodhim qytetarët sepse kemi bagazh dhe kemi punuar drejtë, mirë e me sinqeritet” tha Mustafa, raporton rajonipress.

Mustafa tha se të tjerët dhe rivalët e tij ende nuk janë të organizuar si duhet dhe gjithsesi që besimin për të qeverisur edhe katër vite do ta marrë sërish PDK-ja. “Ne në këtë fushatës hymë me qetësi sepse kemi një numër të madh të projekteve afirmative që kemi bërë për këto vite. Për këto ditë do të takojmë çdo qytetarë e çdo grup shoqëror. Kemi arsye të ndihemi krenar dhe tua shpjegojmë atyre rezultatet. Qytetari gjilanas i beson PDK-së , i beson punës sime mbi të gjitha. Jam i bindur se fitorja është prapë e PDK-së” tha Mustafa.

Mustafa tha se do të bëjnë një fushatë të qetë, të kulturuar dhe nuk do të merren me diskreditime e rrena sikurse po ndodhë me rivalët e tij.”Ata e kanë ndier erën e humbjes dhe po shihen se janë të frustruar. Ne s`kemi nevojë të jemi në panik sepse kemi ngritur punën në administratë, kemi investuar shumë në infrastrukturë, kemi investuar shumë në edukim e arsimim. Edhe tani ne kemi projekte të gatshme dhe kemi ide për ta zhvilluar edhe më shumë dhe më mirë ekonominë. Gjilani është nyjë e mikroregjionit” tha Mustafa.

Kurse Izmi Zeka kryetar i PDK-së tha se qeveria e PDK-së ka investuar për këto gjashtë vite sa 50 vite të tjera që s`ka pasur investime.”Qemajl Mustafa është kryetar i ardhshëm edhe për katër vite , jo pse duam ne, por se kështu e vlerëson qytetaria e Gjilanit. PDK asnjëherë s`ka qenë më e fuqishme sesa sot sepse tani do të fillojmë me projektet e mëdha siç janë autostrada Gjilan – Ferizaj – Prishtinë, hapja e zonave industriale. Thjeshtë është nder që edhe njëherë Gjilani ta ketë kryetar dhe kandidatë për të qeverisur me Gjilanin edhe për katër vite” tha Zeka.

Ndryshe dega e PDK-së nga sot ka nisur hapjen edhe të 23 zyrave të PDK-së nëpër lagje e qendra të qytetit./rajonipress/