Mustafa mund ta braktisë Bllokun pas këshillave të ndërkombëtarëve!

Faktori ndërkombëtar në vend në disa raste është shprehur se nuk do të ishte mirë që Kosova të hynte edhe në një palë zgjedhje.

Halli i ndërkombëtarëve nëse jo për ngërçin politik, më shumë ka të bëjë me normalizimin e raporteve me Serbinë përmes implementimit të marrëveshjes së Brukselit.
E një këmbëngulje e tillë ndërkombëtare, sidomos e SHBA-ve, mund ta zgjidh bllokadën politike në vend, pasi që edhe pas vendimit të Kushtetueses, dy blloqet pretenduese që kanë shumicën, kanë mbetur në pikën fillestare.

Disa herë është përmendur mundësia e një koalcioni të madh gjithëpërfshirës, kur të gjitha partitë do të udhëhiqnin me vendin deri në kohë të pacaktuar, vetëm e vetëm që ngërçi te tejkalohet.

Po ashtu ka pasur edhe tentative që LDK-ja të shkëputët nga Blloku me AAK-në dhe Nismën dhe të bashkohet me PDK-në, mirëpo, të paktën zyrtarisht, një gjë e tillë është hedhur poshtë nga LDK-ja.

Mirëpo, një person i afërt me liderin e LDK-së, Isa Mustafa ka thënë për Indeksonlinë se ai (Mustafa) më nuk mund t’iu thotë jo ndërkombëtarëve nëse këshillohet që të arrijë marrëveshje me PDK-në për një koalcion të dy partive më të mëdha.

“Në rast se ndërkombëtarët bëjnë presion të madh duhet të lëshohet pe”, ka thënë ky zyrtar i lartë i LDK-së në kushte anonimiteti.
E të martën janë shtuar spekulimet për takime të mundshme ndërmjet zyrtarëve të PDK-së dhe LDK-së, edhe pse zyrtarisht asnjëra nga këto dy parti nuk i ka konfirmuar këto takime. /Indeksonline/