Mustafa: Me krejt bëjmë koalicion, veç me Vetëvendosjen jo

Anëtari i kryesisë së PDK’së Rrustem Mustafa, Remi, ka bërë me dije se janë në pritje të certifikimit të rezultateve zgjedhore nga ana e KQZ’së në mënyrë që t’i nisin negociatat për formimin e qeverisë së re.

Ai ka thënë për Epokën e Re se, me përjashtim të Vetëvendosjes, secila parti mund të jetë pjesë e koalicionit me PDK’në.

Mustafa vazhdon të insistojë se Kosovës i duhet koalicioni PDK-LDK sepse sipas tij, vetëm ky koalicion mund t’i çojë proceset përpara.

“E kam shprehur edhe më herët qëndrimin tim, e them edhe tani, se vetëm koalicioni PDK-LDK është koalicion i mundshëm dhe kredibil për kohën që po jetojmë dhe arritjet që synojmë si komb. Në mandatin që vjen, duhet ta ndriçojmë rrugën për në Evropë. Duhet t’i forcojmë institucionet në përgjithësi, edukimin, rendin dhe ligjin në veçanti”, ka thënë Mustafa.