Mustafa: Masakra e Reçakut, krimi që tronditi botën demokratike
RajoniPress
10:11, 15 Janar, 2020
Kryetari i LDK-së, Isa Mustafa në 21 vjetorin e masakrës së Reçakut, ka thënë se kjo masakër zgjoi ndërgjegjen e fjetur ndërkombëtare ndaj padrejtësive dhe krimeve shekullore të Serbisë mbi popullin e Kosovës.
“Sot, bëhen 21 vite nga momenti kur ndodhi Masakra e Reçakut, njëra nga krimet më të tmerrshme të regjimit serb mbi popullatën civile shqiptare. Aktin makabër të regjimit të Millosheviqit e pa nga afër i tmerruar edhe ambasadori i OSBE-së, William Walker. Masakra e Reçakut, zgjoi ndërgjegjen e fjetur ndërkombëtare ndaj padrejtësive dhe krimeve shekullore të Serbisë mbi popullin e Kosovës”, ka deklaruar Mustafa.
Mustafa ka thënë se viktimat e Reçakut , janë vulë e çlirimit dhe shtet-formimit të Kosovës.
“Viktimat e Reçakut, janë vulë e çlirimit dhe shtet-formimit të Kosovës, ata janë në piedestalin e historisë më të re, andaj përulemi para veprës së tyre. Pa sakrificën e tyre, liria nuk imagjinohej dot. Lavdi jetës dhe veprës të rënëve në Masakrën e Reçakut!”, tha Mustafa. /Telegrafi/
