Mustafa: Koalicioni do të funksionojë

Kryetari i LDK-së, Isa Mustafa, gjatë takimit me Marieluise Beck, anëtare e Komitetit për Politikë të Jashtme në Bundestagun gjerman, e ka siguruar këtë të fundit që koalicioni do të punojë në të mirën e të gjithë qytetarëve të vendit dhe do të jetë garanci për vazhdimin e raporteve të shkëlqyera me Gjermaninë.

Gjatë ditës Mustafa ka mbajtur dhe një takim me kryetarët e degëve, të cilët i ka njoftuar me ecurinë e aktiviteteve dhe të proceseve politike pas zgjedhjeve nacionale të 8 qershorit.

Në këtë takim, Mustafa ka folur për detajet e marrëveshjes së koalicionit LDK-AAK-Nisma për Kosovën, si dhe për masat që po merr koalicioni për implementimin e saj. “Do të punoj që marrëveshja të implementohet sa më parë dhe se Qeveria, që do të dalë nga kjo marrëveshje, do të punojë për të mirën e vendit. Në ditët në vijim partnerët e koalicionit do të punojnë për përgatitjen e programit të përbashkët qeverisës”, ka thënë Mustafa në këtë takim.

Ndërkaq, për gazetën, nënkryetarja e LDK-së, Teuta Sahatqija, ka thënë se në këtë proces kanë hyrë bashkë me VV-në dhe po ashtu, sipas saj, bashkërisht me VV-në do të bisedohen dhe kushtet që kjo e fundit ka ngulur këmbë. Sahatqija tha se me “Vetëvendosjen” do të flasin për modalitetet dhe do t’i shohin edhe mundësitë që edhe VV-ja të ketë pjesë në qeverisje. Ajo ka theksuar se LDK-ja ka përkrahur bisedimet, si dhe përkrah partneritetin e Kosovës me bashkësinë ndërkombëtare, si dhe nuk përjashton mundësinë që në këto bisedime të jetë dhe VV-ja.

“Kemi hyrë së bashku dhe me “Vetëvendosjen” do të diskutohen dhe shumë çështje të tjera”.

Kurse, anëtari i kryesisë së Nismës, Bilall Sherifi, tha se marrëveshja për koalicionin është vendosur pasi partitë opozitare kanë shprehur qëndrime të njëjta politike për Qeverinë e ardhshme, prandaj ai thekson se asnjë parti që ka marrëveshje të mbështesë koalicionin nuk mund të dalë me qëndrime veç e veç.

Sipas tij, mandatari për kryeministër të Kosovës, Ramush Haradinaj, është duke biseduar dhe me VV-në. Sherifi tha se është obligim i të mandatuarit për kryeministër që të harmonizohen qëndrimet e partive që mbështesin koalicionin dhe janë pjesë e marrëveshjes. Ai ka thënë se “Vetëvendosje” ka të gjitha të drejtën që të inkuadrojë idetë e veta në programin e Qeverisë.