Mustafa kërkon nga amerikanët integrimin e UÇPMB në misionet paqeruajtëse

Preshevë – Ragmi Mustafa, kryetar i Komunës së Preshevës nga takimi i sotëm me përfaqësuesit e SHBA-ve ka kërkuar që ish-ushtarët e UÇPMB-së të përfshihen në misione paqeruajtëse, njofton “Presheva Jonë”.

Në këtë takim Kryetari Mustafa i ka informuar përfaqësuesit e State Departamentit Amerikan me situatën aktuale politike dhe të sigurisë në Luginën e Preshevës, me theks të veçantë për pozitën e shqiptarëve në këtë shtet.

Mustafa këtë kërkesë ia ka bërë sot përfaqësuesve të Departamentit amerikan të shtetit si dhe atyre të Ministrisë së Mbrojtjes pas iniciativës së ndërmarrë që baza Cepotin të shndërrohet në qendër trajnimi për misionet paqeruajtëse,

Përfaqësues amerikan kanë vizituar sot Preshevën ku janë takuar me autoritetet lokale të komunës. Delegacioni i gjerë prej 11 përfaqësuesve të SHBA , përfshirë këtu edhe ata nga departamenti amerikan i shtetit , sektori civil për marrëdhënie me jashtë , nga sektori militar nga atasheu i ambasadës së SHBA në Beograd dhe sekretari politik amerikan janë pritur nga Ragmi Mustafa, kryetari i komunës së Preshevës.

Nga ky takim me autoritetet diplomatike dhe ushtarake amerikane kryetari i Preshevës Mustafa u ka propozuar amerikanëve që ish ushtarët e UÇPMB-së të integrohen në misionet paqeruajtëse në botë për ruajtjen e paqes dhe stabilitetit në zonat e krizave.

“Në këtë mision paqësor nuk duhet të angazhohen edhe forcat speciale serbe dhe xhandarmëria të cilët kanë kryer krime lufte gjatë luftërave në viset e ish-Jugosllavisë” ka sugjeruar Mustafa.