Mustafa i tregon ambasadorit amerikan për bisedimet me Vetëvendosjen

Ambasadori amerikan, Philip Kosnett ka takuar sot të parin e Lidhjes Demokratike të Kosovës, Isa Mustafën e nënkryetarët e kësaj partie, derisa me të njejtët kanë biseduar për negociatat për krijim të koalicionit me Lëvizjen Vetëvendosje.

Kështu u bë e ditur përmes një komunikate për media të nisur nga LDK-ja, ku thuhet se gjatë takimit, Mustafa e ka njoftuar Ambasadorin Kosnett lidhur me rrjedhën e diskutimeve me Lëvizjen Vetëvendosje sa i përket çështjeve programore.

Në veçanti, u diskutua lidhur me harmonizimin e arritur deri tani në fushën e sundimit të ligjit, ekonomisë, çështjeve sociale, arsimit e shëndetësisë.

Mustafa thuhet tutje, shprehi interesimin e LDK-së që Kosova sa më shpejt të ketë institucione funksionale që dalin nga kërkesat e qytetarëve për ndryshim, të shprehura qartë në zgjedhjet e 6 tetorit.

Ai poashtu falenderoi Ambasadën e Shteteve të Bashkuara për përkrahjen e vazhdueshme në të gjitha proceset në të cilat ka kaluar Kosova./GazetaExpress/