Mustafa i quan “strucë” anëtarët e kabinetit qeveritar që nuk po e mbrojnë Hotin

Kreu i LDK-së, Isa Mustafa, ka reaguar ndaj deputetes Mimoza Kusari-Lila, e cila sot kritikoi kryeministrit Avdullah Hoti se ka thyer protokollin duke mos u vetizoluar.

Mustafa ka kritikuar Kusari-Lilën, e cila sipas tij ka kërcënuar sot kryeministrin Hoti se do ta shkarkojnë pasi është infektuar me COVID-19, ndërsa këtë ka a quajtur kanibalizëm politik, transmeton “Zeri.info”.

“Miq të nderuar. Është edukatë elementare njerëzore që e kemi kultivuar në familjet tona të respektojmë të sëmurin. Ta ndihmojmë, t’i japim kurajë ose ta lëmë rehat në telashet e tij. Të ngrihesh në mëngjes e ta kërcënosh Kryeministrin se do të shkarkojmë pse të ka kapur virusi një ditë më parë është kanibalizëm politik, një idiotizëm i skajshëm që kapërcen çdo normë njerëzore. A thua kështu i edukojmë fëmijët?!”, ka shkruar Mustafa.

Në reagimin e tij kreu i LDK-së ka kritikuar edhe kabinetin qeveritar, këshilltarët e ministrat, por edhe bashkëpartiakët që po heshtin ndaj sulmeve që po i bëhen kryeministrit Hoti, duke i cilësuar si “strucë”.
“Strucat e kabinetit qeveritar, këshilltarët, ministrat, por edhe bashkëpartiakët e Hotit dhe të mitë heshtin, sepse atyre nuk ua ka përmendur emrin xhelatja Kusari-Lila dhe se nuk do t’i hajë. Turp!”. ka shkruar Mustafa. /Zëri