Mustafa, i pafuqishëm karshi ministrave serbë

Ministrat serbë në Qeverinë e Kosovës e përkrahin ndërtimin e lagjes “Lugina e Diellit”, pavarësisht faktit se ekzekutivi i vendit e cilëson si ilegal ndërtimin e kësaj lagjeje. Sipas opozitës, kryeministri Isa Mustafa është i pafuqishëm përballë ministrave serbë.

Zëvendëskryeministri i Kosovës Branimir Stojanoviq dhe ministri Dalibor Jevtiq kanë dalë kundër Qeverisë së Kosovës për ndërtimin e lagjes “Lugina e Diellit” në Zveçan. Ata kanë injoruar deklaratat e Qeverisë duke e bërë të pafuqishëm kryeministrin e Kosovës, Isa Mustafa, karshi vendimeve me ndërhyrje direkte nga Beogradi.

Ndërkohë Qeveria e Kosovës ka mbetur vetëm me nivel deklaratash, por nuk ka ndërmarrë asgjë zyrtare deri më tash në parandalimin e këtij projekti të iniciuar dhe financuar nga Serbia. Gazeta “Zëri” ka kërkuar sqarime nga Zyra e kryeministrit nëse do të ketë pasoja për ministrat serbë që po dalin kundër vendimeve të Qeverisë dhe ligjeve të Kosovës, por kjo zyrë nuk ka dhënë asnjë përgjigje.

Ndërtimi i lagjes “Lugina e Diellit” ka filluar më 9 qershor dhe përfshin ndërtimin e rreth 300 shtëpive në të cilat do të kthehen rreth 1500 qytetarë serbë të shpërngulur gjatë luftës./zeri/