Mustafa i ka dërguar letër Gjermanisë që ta shpall Kosovën “vend të sigurt të origjinës

Sipas një raporti të publikuar në edicionin e së martës të së përditshmes gjermane “Handelsblatt”, kryeministri i Kosovës, Isa Mustafa dhe homologu i tij malazez, Milo Gjukanoviq, i kanë bërë të qarta dëshirat e tyre në letrat e dërguara anëtarit gjerman të Parlamentit të Evropës, David McAllister.

“Ne favorizojmë që Kosova të klasifikohet nën ligjin gjerman si vend i sigurt i origjinës”, ka shkruar Mustafa, duke shtuar se persekutimi politik apo tortura nuk ekzistojnë në Kosovë, raporton Koha.net.

Sipas këtij raporti, të cilin e publikon DW në gjuhën angleze, edhe letra e Gjukanoviqit ka një përmbajtje të ngjashme.

“Jam i bindur se Mali i Zi përmbush të gjitha kushtet që të klasifikohet si vend i sigurt i origjinës në frymën e ligjit gjerman”, ka shkruar Gjukanoviq.

Ai shton se nuk sheh asnjë arsye që ndonjë qytetar i Malit të Zi “të kërkojë azil në ndonjë shtet evropian apo tjetër”.

Në lidhje me mendimet e shprehura në letrat e tyre, McAllister, anëtar i partisë CDU të kancelaren gjermane, Angela Merkel, i ka bërë thirrje qeverisë gjermane që të veprojë me shpejtësi në mënyrë që t’i shpallë Kosovën dhe Malin e Zi si vende të sigurta të origjinës, status i cili do t’ua bënte shumë më të vështirë qytetarëve të këtyre vendeve të marrin azil në Gjermani.