Mustafa: Gjykata Speciale nuk gjykon luftën e UÇK-së, por të individëve

Kryeministri i vendit, Isa Mustafa tha të premten para deputetëve të Kuvendit të Kosovës se krijimi i Gjykatës Speciale nuk e cenon pavarësinë e gjyqësorit në Kosovë.
Mustafa këto komente i bëri në Kuvendin e Kosovës në interpelancën e thirrur nga lëvizja Vetëvendosje lidhur me krijimin e Gjykatës Speciale.

Sipas tij, veprimet e Qeverisë lidhur me Gjykatën Speciale mbështeten në letrat e shkëmbyera nga presidentja e Republikës, Atifete Jahajga me përfaqësuesen e lartë për Politikë të Jashtme të BE-së, në atë kohë, baroneshën Catherine Ashton, raporton Telegrafi.

Ai kujtoi deputetët se ky letërkëmbim është ratifikuar edhe në Kuvendin e Kosovës në vitin 2014.

Kreu i ekzekutivit të vendit, tha se lufta e Ushtrisë Çlirimtare të Kosovës ishte e drejtë, ishte luftë për të mbrojtur pragun e shtëpisë.

“Ishte lufte për të mbrojtur pragun e shtëpisë. Ne besojmë në luftën e UÇK-së, prandaj sjellja e individëve nuk mund të identifikohet me luftën e pastër të UÇK-së”, ka thënë ai.

Por kryeministri i vendit tha se po respektojnë një proces të pavarur gjyqësor. “Ne po respektojmë plotësisht një proces të pavarur gjyqësor”, tha Mustafa, duke shtuar se me shpalljen e pavarësisë është e nënkuptueshme edhe marrja e vendimeve edhe kur ato janë të rënda. /Telegrafi/