Mustafa: Gara ishte korrekte, Gjilanit i duhet një kryetar sfidues

Gjilan – Kandidati i PDK-së për kryetar të Gjilanit Qemajl Mustafa ka hedhur votën e tij në shkollën fillore “Thimi Mitko”. Mustafa ka falënderuar qytetarët e Gjilanit për një fushatë të qetë e dinjitoze dhe tha se Gjilanit i duhet një kryetar sfidues pasiqë Kosova dhe Gjilani kanë ende shumë punë për të bërë dhe kërkesa e kritere që kërkohen nga Bashkimi Evropian.

Qemajl Mustafa i shoqëruar nga bashkëshortja e tij ka hedhur votën në shkollën fillore “Thimi Mitko” , raporton rajonipress.

Mustafa pas votimit tha për gazetar se procesi zgjedhor ishte korrekt dhe për këtë meritën më të madhe e kanë qytetarët e Gjilanit. “Unë i falënderoj të gjithë qytetarët që janë angazhuar dhe kanë kontribuar që ky proces të jetë i qetë dhe pa eksese. Gjilani ka treguar një kulturë të lartë qytetëruese kurse nuk më ka pëlqyer gjuha e rivalëve të cilët kanë ngelur në vitet e kaluara. Kam pritur një gjuhë më të kulturuar dhe më të avancuar nga ana e tyre”.

Mustafa tha se Gjilanit i duhet një kryetar sfidues sepse Kosova dhe Gjilani kanë ende punë për të bërë, meqë tani kemi kushte e kritere të përcaktuara nga Bashkimi Evropian.”Është punuar mjaft shumë në këto vite dhe kemi ende mundësi ta zhvillojmë Gjilanin” tha shkurt Mustafa./rajonipress/