Mustafa: Ekonomia u rrit për 4% më 2015, sivjet rritja pritet të jetë edhe më e lartë

Kryeministri i Kosovës, Isa Mustafa, ka thënë se në vitin e parë të qeverisjes së tij është arritur të shënohet normë reale e rritjes së ekonomisë prej 4 për qind.
“Këto të dhëna janë preliminare dhe mund të pësojnë ndryshime të vogla, por e rëndësishme është se kemi tejkaluar mesataren e shumë viteve që sillej rreth 3%”, ka shkruar Mustafa në faqen e tij në Facebook.

Sipas Mustafës, edhe pse Kosova ka nevojë për rritje më të lartë, duhet të vlerësohet si zhvillim tejet pozitiv se rritja ekonomike prej 4% në vitin 2015 është e gjeneruar nga investimet private, sidomos të nxitura edhe nga investimet e huaja direkte.

“Kur rritja ekonomike shkaktohet nga investimet private, sigurohet qëndrueshmëri në rritje edhe për vitet e ardhshme”, ka shkruar Mustafa.

“Të dhënat aktuale, tregojnë se viti 2016 ka filluar më mirë se viti 2015. Rrjedhimisht është e arsyeshme të presim që rritja ekonomike për vitin 2016 të jetë më e lartë. Këtë vlerësim e shohim nga bizneset që i vizitojmë çdo ditë, e shohim nga ekspertët vendor dhe nga organizata ndërkombëtare”, ka theksuar kryeministri në rrjetin social.