Mustafa: E ardhmja e çdo vendi janë fëmijët

Gjilan – Një qershori është dita ndërkombëtare e fëmijëve, të cilët sot kërkojnë vëmendjen e prindërve dhe shtetit dhe shoqërisë drejtohet tek fëmijët në drejtim të respektimit të të drejtave të tyre dhe rritjes të mirëqenies. Kjo ditë përveç që është ditë festive, është edhe një ditë e sensibilizimit, për t`i thënë jo dhunës dhe abuzimit ndaj fëmijëve. Është dita kur vetë fëmijët ngrenë zërin për të drejtat e tyre ka thënë Qemajl Mustafa.

Qemajl Mustafa me rastin e ditës ndërkombëtare të fëmijëve thotë se ndihet i gëzuar që sot fëmijët kanë më shumë të drejta dhe kanë kushte e standarde më të mira duke theksuar se e ardhmja e çdo vendi janë fëmijët, i cili u ka uruar të gjithë fëmijëve 1 qershorin, ditën e tyre.

“Ne kemi bërë përpjekjet tona që për fëmijët të ndërtojmë kënde, parqe dhe kopshte, objekte për parashkollor dhe do të përpiqemi që çdo kërkesë të fëmijëve ta realizojmë edhe në të ardhmen. Ne do të angazhohemi për të realizuar edhe projekte të tjera të cilat do të përmirësojnë edhe më tutje kushtet e jetës dhe të drejtat e tyre” ka thënë Mustafa i lumtur që ndodhet në mesin e fëmijëve gjilanas./rajonipress/