Mustafa: Do të ndalim ikjen e qytetarëve

Lidhja Demokratike e Kosovës e ka shënuar sot 25 vjetorin e themelimit me një ceremoni solemne.Kryetari i partisë, njëherësh kryeministër i Kosovës, Isa Mustafa tha se LDK që nga themelimi para një çerek shekulli e kishte qëllimin properëndimor.

“Sot LDK 25 vjetorin e themelimi të saj po e shënon për herë të parë pas lufte në krye të qeverisjes së vendit, po e shënon si anëtare e familjes së madhe të partive popullore evropiane, me grupin e saj parlamentar prej 32 deputetëve në Parlamentin e Republikës së Kosovës me lidership në 9 komuna të Kosovës, e shtrirë në tërë territorin Republikës së Kosovës dhe në diasporë, me Forumin e Gruas, me Forumin e Rinisë, me Këshillin e Ekspertëve dhe me Fondacionin Ibrahim Rugova”, tha ai.

Si udhëheqëse tashmë i Qeverisë, theksoi Mustafa, LDK do t’u krijojë kushte qytetarëve të Kosovës që të mos e lëshojnë vendin.

Ai i ka porositur të rinjtë që të mos marrin pjesë në konflikte e luftëra në shtete tjera.

Mustafa paraqiti një biografi të shkurtër të rrugëtimit të LDK-së që nga themelimi i saj nga Ibrahim Rugova e deri më tani, duke thënë se gjatë gjithë kësaj kohe ka pasur orientim properëndimor dhe miqësi me SHBA-të, të cilën do ta forcojë edhe më shumë.

Ai shtoi se partia do të punojë me gjithë kapacitetin e saj për anëtarësim në BE, NATO dhe në OKB. /Telegrafi