Musliu takon Komisionin Evropian, paraqet gjendjen e rëndë të shqiptarëve

Kryetari i Këshillit Kombëtar Shqiptar (KKSH), Jonuz Musliu, të premten ka pasur takim pune në Beograd me misionin e ekspertëve faktëmbledhës të Komisionit Evropian të përbërë nga Chloe Laurenc dhe Anastacia Crickley. Mandati i tyre ishte mbledhja e fakteve mbi gjendjen e pakicave kombëtare në Serbi, prandaj ishin jashtëzakonisht të interesuar për gjendjen e shqiptarëve në Luginën e Preshevës.

Në kumtesën e lëshuar nga KKSH, thuhet se kryetari Musliu gjatë këtij takimi ka njoftuar misionin e ekspertëve të Komisionit Evropian me gjendjen e rëndë të shqiptarëve në Luginë të Preshevës. Duke filluar me qasjen diskriminuese të Qeverisë së Serbisë për regjistrimin popullsisë 2011, si abuzimi me të drejtat individuale dhe kolektive të shqiptarëve të Luginës së Preshevës si dhe qasjen slektive në zbatimin e ligjeve nga ana e shtetit të Serbisë.

Gjithashtu, Musliu ka njoftuar përfaqësuesit e Komisionit Evropian me mos zgjidhjen e problemit të të dëbuarve, arrestimet e inskenuara politike të ish luftarëve të UÇPMB-së si dhe problemet që i bëhen në fushën e arsimit, kulturës, informimit dhe përdorimit zyrtarë të gjuhës shqipe dhe shkrimit të saj.

“Theks të veçantë Musliu i kushtoi edhe fenomenit të shlyerjes nga regjistrat, përkatësisht pasivizimin e vendbanimeve të shqiptarëve duke theksuar që është jokushtetues dhe me këtë po i mohohen qytetarëve shqiptar të gjitha drejtat elementare. Në fund kryetari Musliu dorëzoi raportin me shkrim për gjendjen e Luginës së Preshevës”, thuhet në kumtesë, transmeton Titulli.com.

Misioni i ekspertëve faktmbledhës të Komisionit Evropian përpilon raportin mbi gjetjet në teren, dhe nëpërmjet këtij raporti përcaktohen obligimet konkrete për Serbinë gjatë procesit të anëtarsimit në Bashkimin Evropian. /Titulli.com/