Musliu: Për reciprocitet me serbët e veriut të Kosovës

Kryetari i Komunës së Bujanocit, Jonuz Musliu, tha sot se nuk është i kënaqur ne ritmin e zgjidhjes së problemeve të shqiptarëve në komunën e tij.Pas takimit me zyrtarin e Departamentit amerikan të Shtetit, Paul Jukic, dhe atasheun ushtarak në ambasadën e SHBA-ve në Beograd, Paul Brotzen, Musliu tha se zyrtarët amerikanë donin që në vendin e ngjarjes ta shohin se cila është situata në terren.

“Vlerësimi im është se lidershipi serb zotohet për të zgjidhur problemin e shqiptarëve në Luginën e Preshevës, por se ato janë vetëm fjalë, meqë nuk ka hapa konkretë që 12 vjet”, tha Musliu, duke shprehur shqetësime edhe për prezencën e forcave të xhandarmërisë serbe, transmeton Beta.

Musliu tha se në takim, “në mes të rreshtave”, u cek se me qëllim të përmirësimit të stabilitetit në Bujanovc dhe Preshevë, baza ushtarake “Jug”, e cila është disa kilometra larg Bujanocit, do të jetë qendër për trajnim të forcave multinacionale të 13 shteteve, në mesin e të cilave është edhe Serbia, Bullgaria e Shqipëria.

Ai shtoi se pozicioni i Lëvizjes për Progres Demokratik, të cilin e udhëheq, është që përfaqësuesit politikë shqiptarë nga komunat Bujanoc, Preshevë dhe Medvegjë duhet të kenë të njëjtin trup, si serbët nga veriu i Kosovës.

“Ka filluar zbatimi i Marrëveshjes së Brukselit dhe tani është koha që shqiptarët të ndërmarrin hapa për të zgjidhur problemet e tyre politike. Duam reciprocitet me të drejtat që marrin serbët në veri të Kosovës”, ka thënë Musliu. “Kështu, edhe shqiptarët duhet të kenë policinë e tyre, komandantin e policisë, si dhe gjykatën e apelit”. /Telegrafi/