Musliu: Apel për regjistrim të studentëve në Shqipëri

Vizita dyditore në Tiranë e kryetarit të Këshillit Kombëtar Shqiptar (KKSH) Jonuz Musliu ka si rezultat apelin për regjistrim të studentëve të Luginës në drejtimet e mbeturat të lira në universitetet publike shqiptare.

Gjatë këtij qëndrimi, Musliu ka zhvilluar takim me Dekanin e Fakultetit të Mjekësisë në Tiranë, Prof. Dr. Petrit Bare, me të cilin janë dakorduar që studentët të cilët nuk kanë arrit të regjistrohen në drejtimet e dëshiruara, të regjistrohen në ato drejtime ku ka kuota të lira.

“Në takimin e zhvilluar në Tiranë kërkesa jonë ishte që studentët tanë të regjistrohen në fakultetet përkatëse, ndërsa në bisedime me Dekanin, Prof. Dr. Petrit Bare, morëm premtimin që të regjistrohen edhe studentët që kanë mbet pa u regjistruar, duke i plotësuar kuotat e mbetura të lira”, tha për portalin Titulli.com, Jonuz Musliu, kryetar i KKSH-së.

Sipas Musliut, afati i fundit për paraqitje pranë fakulteteve përkatëse është 14 tetori.

Kryetari i KKSH-së të shtunën është kthyer nga Tirana pas qëndrimit dyditor dhe takime të zhvilluara me zyrtarë shqiptarë. /Titulli.com/