Mushkolaj: Përjashtimi i Ajnishahe Halimit, mjerim për Vetëvendosjen

Pas shkarkimit të Ajnishahe Halimit nga detyra e Koordinatores për Qendrën e Vetëvendosjes në Skënderaj nga Lëvizja Vetëvendosje, me arsyetimin se Halimi ka bërë keqpërdorime financiare gjatë kohës që ajo ka qenë në këtë detyrë, Indeksonline ka marrë prononcim nga analisti dhe publicisti Imer Mushkolaj në lidhje me rastin në fjalë.

Mushkolaj për Indeksonline ka thënë se përjashtimi i një gruaje të guximshme si Ajnishahe Halimi vetëm pse ka shprehur mendimin e saj të lirë, është mjerim për Vetëvendosjen, duke i kujtuar Vetëvendosjes se pikërisht ky subjekt politik shquhet dhe mburret për promovim të fjalës së lirë.

“Ta përjashtosh nga partia nji grua të guximshme si Ajnishahe Halimi vetëm pse ka shprehur mendimin e saj të lirë është më shumë se mjerim, është poshtërsi. Me veprimin ndaj znj. Halimi, Lëvizja Vetëvendosje po tregon se, pavarësisht që mburret se e shquan debati, nuk është imune as ndaj shprehjes së mendimit ndryshe nga anëtarësia e vet.”, ka vlerësuar Imer Mushkolaj.

Sipas Mushkolajt, Halimi ka vepruar në një mjedis të vështirë politik, dhe se ajo si grua dhe aktiviste e Lëvizjes Vetëvendosje është bërë simbol i gruas që kundërshton pushtetin.

“Znj. Halimi ka vepruar politikisht si aktiviste e VV-së në një mjedis mjaft të vështirë për të dhe subjektin që i ka takuar, ka vepruar në aso rrethanash, në të cilat kushdo tjetër do ta kishte të vështirë, madje të pamundur që të veprojë politikisht, duke u bërë simbol i gruas që lufton me një pushtet”, ka thënë Mushkolaj.
Analisti politik, Imer Mushkolaj, shton se Vetëvendosje ka bërë veprimin më të pamatur gjer tani duke e shkarkuar zonjën Halimi nga strukturat e subjektit, dhe se Vetëvendosjen gjithnjë e më shumë po e shquan diktati dhe jo debati.

“Me përjashtimin e saj nga radhët e veta, VV ka bërë veprimin më të pamatur të mundshëm dhe njëkohësisht ka bërë të qartë se diktati, e jo debati e shquan atë. Unë e kuptoj disciplinimin partiak, që është gjithsesi i nevojshëm për funksionimin e subjekteve politike, por aboslutisht nuk i kuptoj veprimet e tilla që ngulfasin mendimin e lirë, qoftë edhe kritik për partinë dhe ndëshkojnë të gjitha ata që guxojnë të kundërshtojnë diktatin”, ka thënë Mushkolaj për Indeksonline.