Musa Ramadani sot mbush 70 vite
Gjilan – Musa Ramadani emër i shquar i letërsisë, sot me 21 Maj 2013 ka ditëlindjen e 70 -të dhe përvjetorin e 50 -të të krijimtarisë letrare.
Ars Clubi “BEQIR MUSLIU” si dhe revista letrare – kulturore AGMIA i urojnë shëndet, jetë të gjatë dhe, presin nga Ai, vepra të reja…
Me këtë rast e përgëzoj dhe me këtë poezi, shkëputur nga libri im ZJARRMI E KTHJELLTË, e cila i kushtohet Musa Ramadanit dhe një momenti që ma pat rrëfyer para pesë vitesh në Prishtinë, te bufeja para Teatrit Kombëtar shkruan miku i tij Sabit Rrustemi.
IMAZHET E VJEDHURA
I
Iku dita me imazhet e vjedhura
Në duart e një hajni
Shkrimtari mbeti pa tekst
Rrugës kah zbriste tek sheshi
Pa imazhe e idole që i ruante
Mbeti
Hajnin sa hap e mbyll sytë
E lëshoi toka pa britmë
Në ç’kantë bërllogu
A çufrrajë parku përfundoi
Ai imazh varri i Sadek Hedajatit
Po fotografitë me gjurmët e Kafkës
Shënimet ai filgjan i kafës
Vendet nga ka ecur
Idhulli ku është ndalur
Apo e dashura e tij
E ngrirë në një stacion treni
Ku do ketë tretur
Rrudhë supet kalimtari
Që ngjeshë nën sholla
Mijëra fije bari
II
E – express-ot me radhë
Në kafenenë para teatrit
Nuk e kthjellojnë
Vetëm brengat
Së brendshmi e mjelin
Cigaret e bëjnë shpuzë
Në taketuke
Policët sa nuk qeshën në zë
Kur i a morën deklaratën
Si dëshmi identiteti
Vërtetim t’ përkohshëm i lëshuan
Nisjen e hetimeve premtuan
Po kjo s’e ngushëlloi
Mësa nata që iu kthye
Krejt e zbrazur
Me mungesë të dashurish
E skica vargjesh
Çdo t’i thoshte nesër Sadek Hedajati
Si do t’ia dëshmonte përkushtimin
Po Kafkës
Ah
Ai as që do ta dëgjojë
Mësa të dashurën
Mbylli sytë
Për t’i kërkuar përmes ëndrrës
Një zhurmë nate
E la dhe pa ëndrra
Mëngjesi
E nxorri në të njëjtën rrugë
Për ditë me radhë
Po hajni vodhi dhe gjurmët
As përmes ndonjë pusulle
Nuk e ngushëlloi
( 22 Korrikut 2009)