Mursel Murseli, autori e krijuesi që shkruan për të thënë pak – saktë dhe me mend
RajoniPress
07:27, 11 Gusht, 2025
| 10 muaj më parë
Gjilan – Krijuesi Mursel Murseli është autor i tre librave që kanë vlera dhe i referohen zhvillimeve shoqërore, duke treguar se është një përkujtues i trashëgimisë së pasur, që posedon populli shqiptar. Ai nuk shkruan për famë, por shkruan për të thënë pak e saktë.
Mursel Murseli është shumë i kujdesshëm në çdo paraqitje të tij, qoftë ajo edhe në rrjetet sociale.
Nuk është krijues që vrapon, as pas famës, e as për të treguar çdo ditë talentin e tij në medie, shkruan pak, por për të thënë shumë dhe mbi të gjitha për ta respektuar e nderuar traditën shqiptare, trashëgimin e pasur, dhe kulturën në shumë kënde e breza.
Pra, Mursel Murseli punon në heshtje, shprehet në heshtje, jeton e vepron në heshtje dhe nuk ngurron të thotë hapur, kur e kërkon nevoja e reagimi prej intelektuali.
Edhe pse jeton në mërgim ky autor kujdeset që gjuha të shkruhet pastër, me fjalë të zgjedhura dhe jo me kureshtje bombastike. “Nxitimi”, i vetëm i tij është respekti për gjuhën, respekti për miqtë e tij krijues, me të cilët bashkëvepron në të mirë të kulturës e krijimtarisë.
“Nuk kam shkruar për famë, por për kujtim. Jo për të folur shumë, por për të thënë pak – saktë dhe me mend” ky është konstatimi i këtij autori, i tre veprave të botuara dhe një tjetër në ardhje e sipër.
Pak fjalë për veprat e Mursel Murselit
“Gjurmë mbi Gjurmë” (2016):
Libri im i parë, i mbushur me urti të vjetra, kujtime të përjetuara dhe mendime që më kanë udhëhequr në jetë. Në përpjekje për të mos humbur gjurmët e brezave të mëparshëm.
“Margaritarë nga Thesari i Urtisë Botërore“ (2018):
Një pasuri fjalësh nga mendimi botëror dhe vendor (shqiptar), të përzgjedhura për lexuesin shqiptar me ndjenjë dhe përkushtim. Fjalë që i flasin çdo kohe.
“777 Thënie dhe Fjalë të Urta“ (2022):
Një udhërrëfyes i thjeshtë, me thënie të vlefshme për jetën e përditshme. Numri 777 nuk është i rastësishëm – një simbolikë e dritës dhe e përmasës shpirtërore.
Ndërkohë, së shpejti do të dalë nga shtypi edhe libri i katërt, më i ndjeshmi dhe më i veçanti për këtë autor, një vepër që ua ka kushtuar dy nipave të tij, të lindur në vitin 2024. /rajonipress/
