Murati: Tërheqja e parave nga Trusti shkakton precedent të rrezikshëm dhe çmime më të larta

Ministri i Financave, Punës dhe Transfereve, Hekuran Murati ka folur për mundësinë e tërheqjes së mjeteve nga Trusti, për të cilat tha se nuk do t’i ndihmonte familjet në nevojë, raporton Ekonomia Online.

Për mundësinë e tërheqjes së mjeteve të TRUST-it, Ministri i Financave, Punës dhe Transfereve, Hekuran Murati, tha se është rrezik të preken mjetet e TRUST-it.

“Kjo do të shkaktonte precedent të rrezikshëm, pra po vërtetohet ajo që e kemi thënë edhe më parë për mjetet e TRUST-it. Ky fond nuk do të mund të ndihmojë ato familje që kanë nevojë”, tha ai.

Gjatë shqyrtimit të këtij projektligji në Komisionin për Buxhet, Punë dhe Transfere, ministri Murati theksoi se një rishikim pas katër muajve mundëson të plotësohen nevojat në këtë kohë krize.

“Rishikimi është bërë vetëm në Ministrinë e Financave, me një shtim prej 150 milionë euro. Vlera që shtohet e buxhetit është 150 milionë e 500 mijë euro dhe rishikimi bëhet vetëm në Ministrinë e Financave në Pakon e Ringjalljes Ekonomike, te kategoria subvencione dhe transfere. Kjo vlerë financohet nga rritja e të hyrave prej 66 milionë euro”, theksoi ai.