Mungesa e sinjalizimit të rrugëve në ndërtim e sipër, u sjell telashe serioze vozitësve

Gjilan – Një nga problemet që qytetarët e Gjilanit e kanë ngritur është lidhur me punimet në rrugët në ndërtim e sipër, e ku raportohet për probleme me sinjalizim. Vozitësit, jo rrallë-herë hutohen. Pa udhëzime të qarta, ata ndihen të detyruar të marrin vendime të cilat mund të i vejnë në rrezik pjesëmarrësit e tjerë në komunikacion.

Ata raportojnë se këto rrugë, në të shumtën e rasteve, nuk shënjohen proporcionalisht krahas progresit të ndërtimit. Ka raste kur mungon tërësisht shënjimi, ose nuk vendoset në mënyrë adekuate. Ose edhe ka raste kur shenjat vendosen në shpërputhje me rregullat e komunikacionit, duke bërë kështu që shoferët njoftohen me vonesë për veprimet që nevojitet të i ndërmarrin për të përshtatur lëvizjen e tyre.

E tillë është edhe rruga Gjilan – Kamenicë, aty ku po zhvillohen punimet e zgjerimit të infrastrukturës rrugore. Duke qenë se një pjesë e karrexhatës në drejtim të Gjilanit ende nuk është vënë për qarkullim, vozitësit shfrytëzojnë vetëm njërën për të dyja drejtimet. Në pikën e ndërrimit të karrexhatës, udhëzimet janë të vendosura shkel-e-shko. Madje, situata përkeqësohet sidomos gjatë mbrëmjeve, meqenëse në pikën e bashkimit, nuk ka sinjalizim me drita për të paralajmëruar shoferët.

Së fundi, qytetarët kanë shprehur shqetësime edhe në rrjetet sociale, ku kanë komentuar perspektivat e tyre, për rastet të cilat janë raportuar në mediat lokale.

Më ka ndodh personalisht kur e kam ngatërruar. Siklet dhe rrezik deri në maksimum. I falënderoj vozitësit që më kanë lajmëruar, ka thënë Astriti.

Hyn sepse tabelat sinjalizuese janë aq të dobëta e pa vend sa vështir vërehen. Ani në drejtimin Gjilan-Kamenicë tabela të del pasi futesh prej dy trakshit në dy drejtime të kundërta. E pabesueshme, ka theksuar Veliu.

Kurse, Mirsadi thotë se punimet po zgjatin me vjet. Qashtu ka qenë prej fillimit, Kurrë s’ka pas shenja qysh duhet.

Mungesa e përgjegjësisë nga punë-kryesit. Nuk ka sinjalizime të duhura, e më e keqja është në mbrëmje, ka shkruar Demiraliu.

Derisa Islami shprehet se shenjat janë katastrofë. Tepër jemi tu dit pa shenja. Dilni jashtë Kosovës. Shihni si janë shenjat e njoftimeve, shton ai.

Në këtë mes, qëndrojnë autoritetet lokale, të cilat ose me vonesë ose fare nuk adresojnë problemet e shënimit adekuat aty ku ka punime rrugore. Këtu nuk përjashtohen nga përgjegjësia as punë-kryesit. Rol në sigurinë rrugore ka edhe autoriteti policor, e që ka përgjegjësi të paraqes problemet pran autoriteteve të infrastrukturës.

Prandaj, autoritet gjegjëse, duhet që pa vonesë të zgjidhin këtë problem, në të gjitha rrugët e Gjilanit, për ta bërë qarkullimin e sigurt për përdoruesit e saj. Në fund të fundit, një infrastrukturë rrugore e sigurt dhe efikase është në interes të të gjithëve./rajonipress/