Mujota: Gati për kontratën për autostradën Prishtinë – Hani i Elezit

Ministri në detyrë i Infrastrukturës Fehmi Mujota në emër të Komisionit Ndërministror për ndërtimin e rrugës 6 Prishtinë- Hani i Elezit, e ka njoftuar kabinetin me Vendimin e Komisionit Drejtues Ndërministror për zhvillimin e projektit Rruga 6 Autostrada Prishtinë- Hani i Elezit.

Ministri Mujota ka bërë të ditur se Komiteti ka zhvilluar të gjitha procedurat e nevojshme konform ligjeve dhe konform konkurseve ndërkombëtare në projekte të tilla të mëdha, dhe duke respektuar plotësisht të gjitha procedurat tjera për përzgjedhjen e Këshilltarit të Transaksionit, dhe punën e përbashkët të autoritetit kontraktues.

Pas dy viteve pune, Komisioni Ndërministror ka zgjedhur kompaninë Bechtel & Enka si më të suksesshmen në bazë të konkursit të shpallur. “Komisioni Ndërministror ka arritur që ato çështje që janë sqaruar brenda këtij afati kohor t’i aprovoj të tërat, dhe të autorizoj autoritetin kontraktues , në këtë rast Ministrinë e Infrastrukturës, për përfshirjen në kontratën përfundimtare dhe për nënshkrimin e kontratës”, ka bërë të ditur ministri Mujota./zeri/