Mujota e Surdulli inspektojnë punimet

Gjilan – Kryetari i komunës së Kamenicës Shaip Surdulli, të martën në vizitë zyrtare ka mirëpritur Ministrin e infrastrukturës Fehmi Mujotën i shoqëruar nga zëvendësministri Emin Krasniqi, zëvendësministri i Administrimit të Pushtetit Lokal Basri Musmurati, deputeti Zenun Pajaziti dhe bashkëpunëtorë të tjerë.

Kryetari Surdulli dhe Ministri Mujota me bashkëpunëtorë, panë nga afër realizimin e projekteve, në komunën tonë. Kryetari Surdulli, falënderoj Ministrin Mujota, për vizitën e bërë dhe për mbështetjen e ministrisë që ai drejton në realizimin e projekteve, sidomos atyre rrugore në komunën e Kamenicës.

Kryetari Surdulli e njoftoi Ministrin Mujota për realizimin e projekteve dhe ato që janë në realizim e sipër në komunën e Kamenicës, si asfaltimi i disa rrugëve lokale me participim të qytetarëve, renovimi i disa shkollave, ndërtimi i objektit të ri të komunës dhe projekte të tjera.

Ndërsa, Ministri Mujota falenderoi Kryetarin Surdulli për punën e nivelin e lartë të angazhimit të tij rreth projekteve të realizuara dhe ndër të tjera tha:”Ne jemi të interesuar që të ndërtojmë rrugë aty ku kërkohet nevoja e banorëve të Kosovës, pa asnjë dallim në nivel komunash apo çka do tjetër. Ndërtimi i rrugëve është prioritet i Qeverisë së Kosovës dhe Ministrisë së Infrastrukturës, në mënyrë që të ndihmohet jeta e qytetarëve të Kosovës, si dhe zhvillimi ekonomik i vendit, duke e përfshirë edhe zhvillimin e turizmit, në këto pjesë“.

Ministri Mujota bëri të ditur se Ministria e Infrastrukturës, në komunën e Kamenicës po realizon projekte të ndërtimit të rrugëve në vlerë prej 4 milionë e 343 mijë e 801 euro.
Në këtë komunë janë duke u realizuar këto projekte rrugore:Rehabilitimi i rrugës, Roganë-Hogosht , në gjatësi prej 8 kilometrash, me vlerë të kontratës 490, 116.24 euro. Projekti tjetër, Shipashnicë-Desivojcë, me gjatësi prej 3.5 kilometra, ndërsa vlera e këtij projekti është 617, 685.77 euro. Si projekt tjetër për komunën e Kamenicës është edhe rruga e fshatit Poliqkë, me vlerë financiare 686, 000.00. Në këtë komunë si projekt tjetër është edhe ai Prekovc-Marec-Krilevë, gjatësia e kësaj rruge, është 18.5 kilometra, ndërsa vlera e projektit është 2,550.000./rajonipress/