RCCOLA

Muhamet Hasani, rrobaqepësi shqiptar i Messit

/ 4 minuta lexim

Ylli që po çmend botën, Lionel Messi, ka pasur punë me shqiptarë. Madje, argjentinasi është veshur në mënyrë solemne nga shqiptari i Kosovës, Muhamet Hasani. Muki, siç njihet ndryshe, është rrobaqepës dhe punon në firmën itaiane ‘Ermenegild Zehna’.

Ai jeton në Barcelonë prej vitit 2000, kurse gjysma e jetës i ka shkuar në kurbet. Kosovën e ka lëshuar në vitin 1989. “Në këtë firmë punoj nga viti 1995, 7 vjet kam punuar në Angli, kurse nga viti 2000 në Barcelonë. Rrobaqepës kam punuar edhe në Prishtinë”, thotë Hasani për gazetën ‘Sport’.

45-vjeçari gjatë punës së tij ka pasur shumë vizitorë, por klientin më të ‘veçantë’ e ka Lionel Messin, të cilin e ‘mësoi’ se si të vishet për ceremoninë e marrjes së çmimit ‘Topi i Artë 2010’. “Para se të shkonte në Cyrih për të marrë Topin e Artë për vitin 2010, ai ishte në firmën tonë, së bashku me babain e tij, vëllezërit dhe njerëzit tjerë. Erdhi për të zgjedhur teshat të cilat do t’i vishte në ceremoni. Fillimisht më kërkoi që t’ia bëja një propozim. I thash të veshte këmishën e bardhë, katin e zi, kurse kravatën e kaltër, pasi kjo e fundi do t’i shkonte me ngjyrat e shtetit të tij, Argjentinës. Ai pranoi me kënaqësi. Ato rroba ia dërguam në Zvicër dhe më pas i veshi në ceremoni”, tregon Muki. “Kur erdhi Messi, para lokalit nuk shihnim tjetër, pos njerëz, të cilët u grumbulluan në numër të madh”.

Messi, pak njohuri për Kosovën

Krahas veshjes, Hasanit i ka rënë të rrijë rreth 30 minuta me Messin, të cilin thotë se e njoftoi edhe me Kosovën. “Është aq njeri i mirë dhe i thjeshtë sa që kemi biseduar rreth 30 minuta me të. Më pyeti se prej nga vijë. I thash nga Kosova dhe e dinte shumë pak. U desh t’ia shpjegoj me hartë se ku gjendet Kosova. Më tha se kurrë nuk ka takuar njeri nga Kosova. Më pyeti se çfarë gjuhe flasim”, vazhdon Hasani.

Mobi Casa

Ai tregon se çfarë njeriu është Messi jashtë fushe. “Është shumë djalë i mirë. I urtë dhe po ashtu i marrueshëm. Është tip më ndryshe se Ronaldo. Nuk është mendjemadh”. Kjo nuk ishte vizita e parë dhe as e fundit e Messit në firmën “Ermenegild Zehna”. “Ka qenë edhe para 6-7 muajve, ka blerë një çantë të lëkurës dhe 2-3 xhamperë. Këtu vetëm jemi përshëndetur, pasi iku menjëherë”

Puyoli, më gilipter se Messi

Krahas Messit, firmën në të cilën punon Hasani e ka vizituar edhe kapiteni i Barcelonës, Carles Puyol. Muhameti thotë se Puyol, është tip shumë më i gjallë se Messi. “Puyoli është më gilipter. Më vështirë bisedon me të se sa me Messin. Ai vishet më shumë në mënyrë sportive”. Çdo mysafir i famshëm i Mukit, nuk ka qare pa u njoftuar edhe me Kosovën.

“Mundohem të lobojë për Kosovën. Jo vetëm Puyol e Messi, por ka pasur dhe ka edhe shumë aktor, basketbollistë e shumë të tjerë që vijnë këtu. Të gjithëve u tregoj se jam nga Kosova dhe kur nuk e dinë ua shpjegoj se ku gjendet”, potencon Hasani që vije nga Prishtina. Ai pohon se ka miqësi të mirë edhe me ish-presidentin e Katalunisë, Jordi Puyol, për të cilin thotë se kishte njohuri për Kosovën më shumë se vetë ai. Atij i ka ndodhur ta vizitoj edhe Pau Gasol dhe aktor të ndryshëm.

Hasani nuk ka se si të mos jetë tifoz i Barcelonës, të cilën shpesh herë shkon dhe e shikon ‘lajv’. “Ditë më parë isha edhe në takimin e basketbollit Barcelona – Partizani”, potencon Hasani. Ai është i martuar me shtetase spanjolle, kurse fëmijët e tij janë Ariani (15-vjec), i cili merret me basketboll dhe Alberti (7-vjec), që një ditë ëndërron të ndjek rrugën e yjeve të Barcelonës. (ORAinfo)