MTV EMA, Rita nuk fiton – por pushton skenën

Këngëtarja e lindur në Prishtinë, Rita Ora, e ka hapur ceremoninë e sivjetme të ndarjes së çmimeve, MTV Europe Music Awards, që është një nga mbrëmjet më të mëdha të muzikës jashtë SHBA-ve.

Ajo dukej sensacionale e veshur me të kuqe kur arriti në eveniment dhe shkëlqimi i saj vazhdoi në skenën e Festhalle që shënonte 100 vjetorin e themelimit.

Rita këndoi hitin e saj “R.I.P.”, ndërsa gjatë gjithë kohës lëvizte nëpër skenë duke argëtuar publikun e grumbulluar në Frankfurt të Gjermanisë.

21-vjeçarja nuk arriti të merrte ndonjë çmim, edhe pse ishte e nominuar në dy kategori, ‘Best New’ (e fitoi “One Direction”) dhe ‘Best Push’ (e fitoi Carly Rae Jepsen).
Pas shqiptares në skenë doli idhulli i saj, Gwen Stefani, me grupin “No Doubt”.

Nga emrat tjerë që performuan, ishte Alicia Keys që këndoi “Girl On Fire”. Pastaj, koreani Psy, i cili ka fituar famë të jashtëzakonshme së fundmi, u shfaq në skenë për të performuar hitin e tij “Gangam Style”.

Nuk mungoi paraqitja e reperit Pitbull, pastaj u shfaq Taylor Swift, e cila fitoi tri çmime: artistja më e mirë femër, performanca më e mirë ‘live’ dhe dukja më e mirë.

Nga fituesit, përmendim Justin Bieber, i cili dërgoi në shtëpi trofetë për artistin më të mirë mashkull, performanca më e mirë pop dhe paraqitja më e mirë në skenën botërore.
Nicki Minaj fitoi për performancën më të mirë hip-hop, “Linkin Park” për atë rok, David Guetta për elektronik dhe Lana Del Rey për alternative.

Carly Rae Jepsen fitoi çmimin për këngën më të mirë (“Call Me Maybe”), ndërsa diva e ndjerë, Whitney Houston, u nderua me çmimin ‘ikona globale’. /Telegrafi/