MPB, “avullohen” 1.4 milion euro

Një milion e katërqind mijë euro të Ministrisë së Punëve të Brendshme me të cilat do të duhej të paguhej kompania austriake “Osterreichische Statsdruckerei”, për prodhimin e mijëra pasaportave kosovare, janë “avulluar”.

“Zëri” ka mësuar se shuma e parave është zhdukur në Prishtinë , dhe atë nga përfaqësuesja e OSD-së në Prishtinë, Natalije Velija, e cila, pasi i ka marrë paratë nga dikasteri i brendshëm nuk i ka përcjellë ato te kompania të cilën e përfaqëson.

Mësohet se gjermanja këtë veprim e ka ndërmarrë falë bashkëpunimit të saj edhe me disa zyrtarë të lartë të MPB-së .
Faktin se rreth një milion e gjysmë euro nuk kanë “arritur” kurrë te kompania, por janë tjetërsuar në Kosovë e ka konfirmuar edhe vetë Ministri Bajram Rexhepi.

Ai ka theksuar se sapo të kërkohet nga autoritetet e Kosovës që t’i nisin hetimet, kjo do të bëhet, ndërsa keqpërdoruesit do të ndeshen me ligjin, qofshin ata të punësuar në MPB ose jo.