MPB, 1.4 milion euro borxh për pasaportat

Ndërmarrja austriake që i prodhon pasaportat e kosovarëve, “Osterreichische Staatsdruckerei” (OeSD), nuk do të pres gjatë dhe nëpërmjet gjyqit, do tëq përpiqet të nxjerrë borxhin që thotë se ia ka Ministria e Punëve të Brendshme (MPB). Pretendon në 1.4 milion euro borxh.

MPB-ja ka insistuar ta ketë shlyer këtë obligim kontraktual. Zyrtarë të këtij institucioni kanë theksuar se pagesën e kanë bërë tek Natali Velija, firma e së cilës “Consulting EU sh.p.”, sipas tyre është përfaqësues i OeSD-së në Kosovë.

Ministri Bajram Rexhepi ka thënë se pagesa është realizuar, bazuar në një aneks-marrëveshje. Përfaqësuesit e OeSD-së deri më tani nuk janë deklaruar për këtë rast. Por i kanë dhënë fund heshtjes. Në një prononcim për “Kohën Ditore”, drejtori gjeneralë i OeSD-së, Reinhart Gausterer, ka mohuar që dikush tjetër ka pasur autorizimin për të marrë këto mjete monetare.

“’Consulting EU Sh.p.k.’ në asnjë moment nuk ka qenë e autorizuar të pranojë pagesa për OeSD”-në ka thënë Gausterer. “OeSD-ja në asnjë moment nuk i ka dhënë urdhër MPB të Kosovës që faturat t’ia paguajë ndonjë instance tjetër, e cila nuk parashihet në kontratën për furnizim”.

Sipas versionit të drejtorit Gausterer, firma kosovare “Consulting EU Sh.p.k.” e Velijajt, ka qenë kontraktore eksterne.