“Mos e nënvlerësoni Sllovakinë”, Herolind Shala për play-offin: Me Fodën kemi bërë ndryshime..!

Ish-futbollisti i Kombëtares së Kosovës, Herolind Shala e ka vlerësuar si kundërshtar të fortë Sllovakinë në plejofin për kualifikim në Kampionatin Botëror të futbollit për vitin e ardhshëm në ShBA.

Ai ka thënë se Sllovakia ka lojtarë të fuqishëm dhe nuk duhet nënvlerësuar.

“Ndeshje shumë e vështirë nuk duhet me nënvlerësuar Sllovakinë. Kanë bërë paraqitje të mira në Kampionatin Evropian, luajnë shumë fuqishëm dhe ka me qenë një ndeshje e vështirë”, ka thënë Shala në emisionin sportiv “VAR” në Tëvë1.

Ai ka përmendur edhe pikat e forta të Kosovës në këtë ndeshje.

“Pikat e forta të Kosovës janë organizimi shumë i mirë, tranzicionet i kemi fenomenal me Fodën dhe kjo mund me penalizuar Sllovakinë. Ata janë në shtëpi ne duhet mi prit dhe normal me goditje standarde”, ka thënë Shala.

Kosova nëse kalon Sllovakinë në gjysmëfinalen e plejof-it, në finale do të pres në “Fadil Vokrri” fituesin e duelit Turqi – Rumani.

Ndeshjet e playoffit luhen në mars të vitit të ardhshëm.