Mogherini: Asociacioni nuk paraqet rrezik për Kosovën

“Ju nuk duhet të bëheni Evropë, ju jeni Evropë”. Kështu u është drejtuar ligjvënësve kosovarë përfaqësuesja e lartë e Bashkimit Evropian për Politikë të Jashtme dhe të Sigurisë, Federica Mogherini, e cila të enjten ka arritur t’i bashkojë, pas një kohë të gjatë, pushtetin e opozitën në një seancë solemne në Kuvendin e Kosovës. Në këtë seancë Mogherini ka thënë se Kosova është Evropë, duke uruar institucionet dhe qytetarët e Kosovës për rekomandimin e Komisionit Evropian për liberalizimin e vizave.

Zëvendëspresidentja e Komisionit Evropian gjithashtu ka kërkuar nga Kosova të gjejë kurajën për të arritur pajtimin me Serbinë, ndërsa spektrit politik në vend i ka kërkuar që mospajtimet t’i zgjidhë përmes dialogut. Mogherini gjithashtu ka siguruar se Asociacioni i Komunave me shumicë Serbe nuk paraqet rrezik për Kosovën.

Përfaqësuesja e lartë e Bashkimit Evropian për Politikë të Jashtme dhe Politika të Sigurisë, Federica Mogherini, ka shprehur gëzimin që janë bërë bashkë pushteti e opozita pas një kohë të krizës në Kuvend.

“Është një përgjegjësi e madhe në shpatullat tona dhe tuaja, por e dimë se Kosova po e sheh këtë moment me pritje të mëdha. Por një demokraci e re dhe e përgjegjshme ka nevojë për të gjitha partitë për të ndarë vizionin e ecjes përpara të shtetit”, ka thënë zëvendëspresidentja e Komisionit Evropian. /zeri/