Mllefi qytetar, në prag të shpërthimit

Abuzimi me pushtetin po bëhet i padurueshëm. Arroganca qeveritare e shton pezmin e popullit

Paralajmërimi i opozitës për të dalë rishtas në protestë, sipas analistëve politikë, po shihet si një rrezik i radhës, të cilit nuk mund t’i shpëtojë më dhe të mbijetojë Qeveria e Kosovës, sepse do të jetë vështirë të kontrollohet ky mllef

Vazhdimi i mbetjes së situatës politike në ngërç, edhe gati një javë pas protestës së fundit të opozitës së bashkuar, pozicionimi pa asnjë sinjal ndryshimi mes pozitës dhe opozitës, sipas analistëve, vetëm sa po e forcon mbështetjen popullore për opozitën e bashkuar dhe kërkesat e saj të bazuara në vendimin e gjykatës kushtetuese.

Ata shprehen se pezmi dhe zemërimi i popullatës ndaj Qeverisë dhe këtij pushteti aktual që po e rrënon Kosovën sa po vjen e po bëhet gjithnjë e më i vrullshëm.

Paralajmërimi i opozitës për të dalë rishtas në protestë, sipas analistëve politikë, po shihet si një rrezik i radhës, të cilit nuk mund t’i shpëtojë më dhe të mbijetojë Qeveria e Kosovës, sepse do të jetë e vështirë të kontrollohet ky mllef, nëse edhe ditët në vijim Qeveria nuk reflekton. Opozita nuk e ka caktuar ende datën e re të protestës, por ka paralajmëruar se nuk do të ndalet deri në rrëzimin e Qeverisë ‘Mustafa’./kosova sot/