MKRS ndanë buxhetin për ndërtimin e palestrës sportive në Viti

Viti – Një lajm i mirë për të gjithë sportdashësit e Komunës së Vitisë, ka ardh nga Ministria e Kulturës, Rinisë dhe Sportit të Republikës së Kosovës e cila ka ndarë një buxhet për ndërtimin e palestrës sportive në këtë komunë. Kjo palestër pritet të ndërtohet në afërsi të fshatit Drobesh dhe kapaciteti i saj do të jetë për një mijë ulëse. Kryetari i Komunës së Vitisë Sokol Haliti e ka mirëpritur vendimin e MKRS-së për ndërtimin e kësaj palestre sportive duke e quajtur si jetike për sportin dhe kulturën në Viti.

Për këtë vit MKRS ka ndarë një buxhet për projektin e ndërtimit të Palestrës Sportive në Viti. Në shkresën e dërguar nga kjo ministri në adresën e kryetarit të Komunës Sokol Haliti thuhet se përveç se kjo ministri ka ndarë buxhetin për ndërtimin e palestrës sportive kërkon që kjo komunë të merr të gjitha hapat e duhura për realizimin e këtij projekti që shihet si shumë i rëndësishëm për qytetarët vitias.

Palestra Sportive në Viti parashihet të këtë një kapacitet prej 1000 ulëseve, ndërkaq objekti parashihet të jetë i standardizuar dhe atë në mënyrë që të plotësojnë kriteret për zhvillimin e garave kombëtare dhe ndërkombëtare.

Gjithashtu parashihet që ky objekt do t`i plotësojë kushtet për zhvillimin e aktiviteteve kulturore dhe sportive në Viti.

Kryetari i Komunës së Vitisë Sokol Haliti e ka mirëpritur vendimin e MKRS-së për ndërtimin e kësaj palestre sportive duke e quajtur si jetike për sportin dhe kulturën në Viti.

Ai ka falënderuar MKRS-në për ndarjen e këtij buxheti, duke theksuar se komuna të cilën ai e udhëheq do t`i bëjë të gjitha përgatitjet që kërkohen nga Ministria përkatëse. “Do të bëjmë të gjitha përgatitjet paraprake të cilat kërkohen nga MKRS-ja . Gjithashtu dua ta falënderoj këtë ministri për ndarjen e buxhetit për ndërtimin e palestrës sportive në Viti” u shpreh Haliti.

Ndërkaq vitin që lamë pas, Kuvendi Komunal i Vitisë kishte ndarë parcelën për ndërtimin e palestrës sportive në Viti dhe atë në fshatin Drobesh, por vendimi për ndarjen e buxhetit për ndërtimin e saj është marrë ditë më parë nga MKRS-ja. /rajonipress/