Nisrine Tali, bibliotekës së qytetit ia dhuroi 2.000 libra të bibliotekës personale të burrit të saj, Enver Tali…

Gjilan – Ditë më parë, kur Biblioteka e qytetit, Gjilanit, shënoi 80-vjetorin e ditëve të para të punës, e cila njësi e kulturës ishte herët nën ombrellën e Qendrës së Kulturës, të qytetit, aty në moshë të shtyrë u gjend edhe Nisrine Tali, profesoreshë e artit figurativ në një kohë të hershme në ish- Shkollën Normale “Skënderbeu” të Gjilanit. Ajo u gjend dhe nga të gjithë u respektua si një e intelektuale e një kohe, e cila, siç dëgjuam shumë fjalë miradije nga ish nxënësit e saj, ajo ka shkëlqyer në procesin edukativo- arsimor. Jo vetëm kjo.

Nisrine Tali, tash bijë e Preshevës dhe, ma vonë nuse e Gjilanit, ishte e martuar për Enver Talin, një veprimtar i shquar i një kohe. Ajo (Nisrina), ndonëse në moshë, u gjend paksa e lodhur në manifestimin e bibliotekës në fjalë për të konfirmuar fjalën se, 2.000 vepra të bibliotekës personale të burrit të saj, Enver Talit, tash i ndjerë, ia dhuron bibliotekës së qytetit, Gjilanit. Ky është gjesti i saj i rrallë i një intelektuale, e cila, edhe në këtë kohë të lodhshme të saj, erdhi nga afër ta nderojë manifestimin e shënuar në fjalë, njëherit dhe ta përcjellë në vend amanetin e burrit të saj, Enverit. Ishte një rast emocionues dhe prekës, për faktin se, u ngrit në këmbë dhe plot buzëqeshje e tha fjalën që pati. Me këtë rast, të gjithë pjesëmarrësit e kësaj date të shënuar, duartrokitën për gjestin e saj të rrallë. Lotët e këtij momenti nuk u ndalën zvarrë…

Edhe i pari i Gjilanit, z. Lutfi Haziri, është afruar tek Nisrine Tali, të cilën e falënderoi nga zemra për gjestin e saj, e cila ka përcjell amanetin e burrit të saj Enverit, që bibliotekës në fjalë t’ia dhurojë 2.000 libra nga biblioteka personale e tij.
“Zonja e nderuar, Nisrine, shfrytëzoj rastin t’ju falënderoj nga zemra për këtë dhuratë shumë të çmuar, njëherit, pjesëmarrja e juaj, sot, shumë po na nderon në këtë eveniment kulturor. Zoti të dhashtë shëndet! Ju faleminderit për respektin dhe veprat e çmuara të juaja si familje!”, u shpreh kryetari, z. Haziri.

Ndërsa, Zeqir Fazliu, poet dhe ish nxënës e Nisrinës, tha se, kjo profesoreshë e një kohe e Normales, e viteve 1960/61, ka qenë një shembull i rrallë e punëtores me ditar në dorë. “I ka pasur hije puna, qëndrimi dhe pedanteria e mbajtjes së orës mësimore. Vinte pedante dhe na ipte me vullnet lëndën e artit figurativ. I njihte “sendet” e kësaj lënde, ku na bënte për vete dhe na sjellte në botën e ngjyrave, pikturave, peizazheve, akuareleve dhe formave të tjera të artit. Pra, si ka shtuar Zeqir Fazliu, -kjo ka qenë punëtore e madhe e shkollës shqipe.

Edhe Reshat Ramadani (1939), profesor në moshë, tha se, Nisrinën e kam njohur më pak se burrin e saj Enver Talin. Enverin e kam njohur më shumë në aktivitetet kulturore. Ai ka qenë i angazhuar atë kohë në shoqëritë kulturor-artistike. Ndërsa, Misrine Tali, ka qenë një profesoreshë me dije. Ka punuar me një përgjegjësi dhe ka pasur vullnet pune. Ka qenë e sjellshme dhe, edhe sot po më kujtohet figura e saj që vinte në punë krenar e përgatitur për orë mësimore”.

Të shtojmë edhe këtë se, Nisrine Tali, atë ditë “feste”, mezi ecte me përcjellje të dy familjarëve të saj. Ajo tash e shtyrë në kohë, mbi 80-vjeçare, ishte ardhur për të parë nga afër këtë përvjetor të bibliotekës së qytetit, e cila, edhe në këtë lodhje të saj nga koha, mezi fliste pak për vete e për të tjerët. Tek fytyra e saj shihej një buzëqeshje me “dhimbje” për kohën që po ikën, por e gëzuar se po kalon jetën të qetë në këtë moshë të ndihmuar nga të afërmit e saj. Nisrine Talit i uruam shëndet dhe jetë të gjatë. Ajo mezi na ktheu fjalën, “Ju faleminderit”!tefik selimi./rajonipress/