“Mirusha” po rregullohet edhe në pjesët më delikate

Gjilan – Lumi “Mirusha” përkundër pengesave qoftë shpronësore, qoftë atyre financiare po vazhdon të rregullohet. Deri më tani sipas Adem Kqikut janë kryer rreth 1800 metra kanalizim ose 50% e punimeve. Që nga dhjetori kompania nuk ka marrë mjete financiare derisa Kqiku thotë se ne po punojmë, por kemi filluar të lodhemi.

I identifikuar si projekt i Hashim Thaçit dhe i nisur në kohën e qeverisjes së Qemajl Mustafës, lumi “Mirusha” po ecë me punime duke vendosur deri tani rreth 1800 metra gypa të kanalizimit ose rreth 50% e punimeve thotë për rajonipress Adem Kqiku pronar i kompanisë “Bejta Comerc”.

Aktualisht kompania është duke zhvilluar punimet afër stadiumit të qytetit dhe çerdhes në Dardani. Kqiku tha se fillim e mbarim punimet kanë qenë të rënda dhe të vështira për shkak të hapësirës së ngushtë. “Edhe tani tek çerdhja ndodhemi në disa pozicione shumë delikate për shkak të hapësirës së ngushtë, por ne po punojmë me të gjitha kapacitetet në mënyrë që “Mirusha” të ecë dhe të mos stopohen punimet”.

Kqiku tha se edhe pse kanë kryer punë të shumta që nga dhjetori 2013 ata nuk kanë marrë mjete. ”Janë rreth 400 mijë euro që duhet të paguhen nga komuna dhe ne ende nuk kemi marrë asnjë cent. Ne po punojmë çdo ditë, por kemi filluar të lodhemi sepse investimet në këtë projekt janë të shtrenjta” tha Kqiku.

Megjithatë Kqiku tha se qytetarët që ndodhen afër Lumit po tregojnë mirëkuptim sepse gjithçka që po punohet aty, po bëhet në të mirë të tyre dhe ambientit të tyre.

Edhe, Zija Hafizi udhëheqës i punimeve në kompaninë ”Bejta Comerc” tha se ende ndodhen në vijën e punimeve të rënda dhe kjo ka ndikuar që edhe punimet të ecin me ritëm të ngadaltë, por të sigurt. “Është vendi i ngushtë dhe eskavatorët e kanë të vështirë të punojnë normalisht” tha Hafizi./rajonipress/