Miodrag Paviq në pranga- dyshohet për 2400 franga

Gjilan – Miodrag Paviq, gjyqtar i Gjykatës Komunale në Gjilan, është arrestuar në flagrancë nga Policia e Kosovës, pasi ka pranuar ryshfet nga një qytetar. Ramiz Azizi tha se Paviq dyshohet për 2400 franga të cilat mjete i ka pranuar nga një qytetar serb i Pasjanit.

Gjyqtari Miodrag Paviq është prangosur të mërkurën rreth orës 10:30, në dalje të Gjilanit. Kryetari i Gjykatës Komunale Ramiz Azizi tha për rajonipress se Paviq dyshohet se i ka marrë një qytetari serb nga Pasjani rreth 2400 franga për t`ia rregulluar një çështje trashëgimore.

Azizi tha se pasi t`i caktohet masa e ndalimit Paviqit lënda e tij pritet të shkojë në Gjykatën e Prizrenit, për shkak të konfliktit të interesit.

Edhe Agron Uka nga prokuroria e Qarkut tha për rajonipress se Paviqit i është caktuar masa e ndalimit prej 48 orësh./rajonipress/