Ministrit Rexhepi i kërkohet me çdo kusht të largojë strukturat paralele

Jo më larg se dy javët e ardhshme ministri Bajram Rexhepi do të thirret në dëgjim në Komisionin parlamentar për punë të brendshme dhe për siguri, shkaku i aktivitetit të lirshëm të strukturave ilegale të sigurisë në veriun e Kosovës.

Ai do të përballet me kërkesën për të ndalë me forcë atë që ata e quajnë agresion të Serbisë.

Ahmet Isufi, Kryetar i Komisionit parlamentar për punë të brendshme dhe për siguri, ka thënë se autoritetet shtetërore nuk mund të vazhdojnë të rrinë duarkryq karshi kësaj situate.

“Ne si komision do të thërrasim Ministrin e Punëve të Brendshme në dëgjim publik dhe do të kërkojmë që me çdo kusht njësitet e tilla që veprojnë në territorin e Kosovës të largohen nga territori i Kosovës, duke përdorur të gjithë mekanizmat institucional”, ka thënë për “Kohen Ditore” Isufi. “Brenda muajit do ta kemi një dëgjim publik me ministrin”, ka shtuar ai.