“Në fakt, unë jam i bindur dhe për këtë angazhohem vazhdimisht që politika të qëndrojë sa më larg çështjeve të brendshme akademike të Universitetit…”, ka thënë në letërpërgjigjen drejtuar rektorit ministri Bajrami.
Ministri i Arsimit, Shkencës dhe Teknologjisë (MASHT), Arsim Bajrami, i është kundërpërgjigjur rektorit të Universitetit të Prishtinës (UP) “Hasan Prishtina” në akuzat që ky i fundit ka adresuar të martën ndaj tij (Bajramit). Rektori i ka thënë Bajramit se është njeri partiak dhe se klanet e mbështetura nga politika po vazhdojnë të abuzojnë me Universitetin dhe se gjithçka ka nisur në kohën e Bajramit.
Ministri Bajrami një ditë më vonë i është përgjigjur po ashtu me një letër të hapur rektorit Zejnullahu. “Nuk e kam të qartë për çfarë ndryshimi të qëndrimeve aludoni në letrën tuaj, siç nuk e kuptoj pse më atribuoni mua thirrjet për zbutje të standardeve dhe qëndrimeve në çështjet akademike të Universitetit… Unë nuk kam asnjë rezervë në zbatimin e standardeve ligjore dhe akademike të përcaktuara në Statutin e Universitetit”, ka thënë Bajrami në letrën e tij./zeri/
