Ministrat nuk punuan për arsimin

Arsimi del të jetë njëra ndër fushat më të pëlqyera për ta udhëhequr partitë të cilat përbëjnë koalicionin qeverisës. Partia Demokratike e Kosovës dhe Lidhja Demokratike e Kosovës kanë shprehur dëshirat e tyre që të marrin në menaxhim Ministrinë e Arsimit.

Por deri tani këto dy parti nuk kanë arritur që të bëjnë marrëveshje se cilës do t’i takojë dikasteri të cilin po e drejton edhe pak ditë Ramë Buja. Nënkryetari i Partisë Demokratike të Kosovës, Hajredin Kuqi, ka thënë se ende nuk është diskutuar asgjë nga ana e kryesive të të dy partive të koalicionit dhe ende nuk është marrë ndonjë vendim se kujt do t’i takojë posti i ministrit të Arsimit.

“Ende jemi ne konsulta me LDK-në për ndarjen e ministrive. Brenda partisë nuk është diskutuar asgjë lidhur me atë se kujt do t’i takojë kjo ministri”, ka thënë Kuqi. Ndërkaq burime të gazetës theksojnë se ministri i tanishëm i Arsimit Ramë Buja nuk do të jetë në krye të kësaj ministrie pas formimit të qeverisë së re…(Tribuna).