Mini – Mirusha terrorizon banorët e rrugës “Idriz Seferi”

Gjilan – Rreth 60 shtëpi që ndodhen mes rrugës së Kumanovës dhe rrugës “Idris Seferi” në Gjilan jetojnë nën terrorin që sjell kundërmimi i rëndë nga ujërat e zeza. Kjo Mini – Mirusha banorëve u shkakton telashe të mëdha kurse rruga e paasfaltuar ua bënë jetën edhe më të padurueshme.

Mbi 60 shtëpi që ndodhen mbrapa restauruat “Bujana”, janë në hall të madh nga era e rëndë dhe kundërmimi që sjell një Moçal tashmë i njohur edhe si Mini – Mirusha.

Banorët ankohen se nga kundërmimi i rëndë është e vështirë të jetohet aty. Veseli një banor në këtë lagje në periferi të qytetit thotë se Komuna e ka bërë gati projektin edhe për rrugën edhe për këtë kanalizim të tmerrshëm, por deri më tani ka mbetur vetëm premtim fushate.”Ne jemi në hall të madh sepse kjo Mini – Mirusha shkakton erë të rëndë. Edhe mungesa e rrugës së asfaltuar na krijon telashe. Rruga e Kumanovës dhe rruga e “Idriz Seferit” janë të pa asfaltuara edhe pse banorët me vite kërkojnë që këto rrugë të përfundojnë” shprehet Veseli.

Ndryshe banorët thonë se eliminimi i këtij moçali është masë urgjente sepse koha e verës mund të shkaktojë edhe infeksione të ndryshme. “Të jetosh në hyrje të qytetit dhe të përjetosh këtë terror vërtet është e pashpjegueshme” shprehen banorët të revoltuar nga pakujdesi i institucioneve komunale./rajonipress/