Milot Rashica mbërrin në Norwich, disa ditë pas transferimit te klubi anglez

Ylli i Përfaqësueses së Kosovës, Milot Rashica ka postuar një fotografi në rrjetet sociale, ku shihet duke udhëtuar drejt Norwichit, klub me të cilin ka nënshkruar para disa ditësh.

Rashica befasoi të gjitha para disa ditësh, kur u zyrtarizua si lojtar i ri i Norwich Cityt pas transferimit nga Werder Bremen.

Transferimi i djaloshit vushtrrias i ka kushtuar klubit anglez rreth 10 milionë euro, ndërsa Rashica ka nënshkruar kontratë katërvjeçare.

Pasi ka kaluar pushimet verore, sulmuesi i Kosovës ka udhëtuar së bashku me familjen e tij drejt Norwichit, aty ku do të luajë me klubin që mban pikërisht emrin e qytetit.

Është vet Rashica, i cili në profilet e tij private në rrjetet sociale ka postuar një fotografi në aeroplan së bashku me djalin e tij dhe ka treguar se po i bashkohet Norwich Cityt.

Disa minuta pas postimit të fotografisë nga Rashica, është edhe klubi i Ligës Premier që ka shpërndarë atë fotografi të vushtrriasit.

“Zbritje në Norwich”, ishte përshkrimi në postimin e Norwich Cityt. /Telegrafi/